អន្តរជាតិ៖ អតីតខ្សែប្រយុទ្ធក្លិប Chelsea, Newcastle និង West Ham កីឡាករ Demba Ba បានប្រកាសពីការចូលនិវត្តន៍ពីអាជីបជាកីឡាករបាល់ទាត់ហើយ ក្រោយចំណាយពេលប្រមាណ ១៦ឆ្នាំលើទីលាន។

ក្នុងអាជីពចុងក្រោយនៅទឹកដីតួកគី Demba Ba បានឈ្នះពានលីគកំពូលតួកគី ២លើកជាមួយក្លិប Besiktas នៅឆ្នាំ២០១៧ និងឈ្នះម្តងទៀតជាមួយក្លិប Basaksehir នៅឆ្នាំ២០២០កន្លងទៅ។ Ba ក៏ធ្លាប់មកប្រកបអាជីពនៅទឹកដីអាស៊ីបាន ២ឆ្នាំផងដែរ ដោយលេងឱ្យក្លិបចិន Shanghai Shenhua កាលពីឆ្នាំ២០១៥-២០១៧ មុននឹងចុងក្រោយបង្អស់ប្រកបអាជីពនៅទឹកដីស្វីសជាមួយក្លិប​ FC Lugano និងចាកចេញកាលពីខែសីហាកន្លងទៅ។ 

Demba Ba បានបង្ហោះសារនៅលើបណ្តាញ Twitter របស់គេថា ក្នុងអារម្មណ៍ដែលពោរពេញទៅដោយភាពរំភើប និងរីករាយជាមួយអាជីពនាពេលកន្លងមក ថ្ងៃនេះគឺជាពេលវេលាសម្រាប់ការប្រកាសចូលនិវត្តន៍របស់គេហើយ។ កីឡាករវ័យ ៣៦ឆ្នាំរូបនេះបានបន្តថា ក្រៅពីភាពរីករាយ ញើស ទឹកភ្នែកដែលធ្លាប់ជួបប្រទះនាពេលកន្លងមក បាល់ទាត់បានផ្តល់នូវអ្វីគ្រប់យ៉ាងសម្រាប់គេ ហើយវានឹងស្ថិតក្នុងការចងចាំរបស់គេរហូត។ 

គួរបញ្ជាក់ថា Demba Ba បានបង្ហាញខ្លួននៅក្របខណ្ឌ Premier League នៅឆ្នាំ២០១១ ក្រោយផ្ទេរមកពីក្លិបអាល្លឺម៉ង់ Hoffenheim។ កីឡាករសញ្ជាតិសេណេហ្គាល់រូបនេះបង្ហាញខ្លួនបាន ៣រដូវកាលជាមួយក្លិបមួយចំនួនដូចជា West Ham, Newcastle និង Chelsea មុននឹងចាកចេញទៅកាន់អាជីពនៅតួកគី និងចិននៅឆ្នាំ២០១៤។ Demba Ba ក៏ធ្លាប់ត្រូវបានកោះហៅចូលក្នុងក្រុមជម្រើសជាតិសេណេហ្គាល់ផងដែរ ចន្លោះឆ្នាំ២០០៧ ដល់ឆ្នាំ២០១៥៕